ភ្នំពេញ៖ កម្ពុជា និងប្រទេសម៉ារ៉ុកអាចនឹងបង្កើតទំនាក់ទំនងឱ្យកើនឡើងបន្ថែមទៀតដែលផ្ដើមចេញពីទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំងពីរ។ នេះបើតាមការលើកឡើងរបស់នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ក្នុងជំនួបជាមួយប្រធានសភាម៉ារ៉ុកលោក Rachid Talbi EL Alami។

ក្នុងជំនួបជាមួយលោក Rachid Talbi EL Alami កាលពីល្ងាចថ្ងៃទី២៣ ខែវិច្ឆិកា ឆ្នាំ២០២២ នៅវិមានសន្ដិភាព នាយករដ្ឋមន្ត្រី សម្ដេចតេជោ ហ៊ុន សែន បានថ្លែងដោយជំរុញទៅកាន់ប្រទេសម៉ារ៉ុកបង្កើនទំនាក់ទំនងសេដ្ឋកិច្ច និងពាណិជ្ជកម្មជាមួយកម្ពុជា ដោយថាវិស័យទាំង២នេះនឹងក្លាយជាមូលដ្ឋានដែលជំរុញដល់ទំនាក់ទំនងល្អទាំងវិស័យនយោបាយ និងវិស័យដទៃទៀត។

ជំនួយការសម្ដេចតេជោលោក អ៊ាង សុផល្លែត បានថ្លែងប្រាប់ក្រុមអ្នកសារព័ត៌មានថា៖ «សម្ដេចតេជោមានប្រសាសន៍ថា យើងអាចពិនិត្យមើលការរៀបចំកិច្ចព្រមព្រៀងមិនយកពន្ធត្រួតគ្នាដើម្បីសម្រួលដល់វិនិយោគិនឱ្យមកវិនិយោគនៅប្រទេសទាំងពីរ»។

របាយការណ៍ក្រសួងពណិជ្ជកម្មឱ្យដឹងថា ក្នុងឆ្នាំ២០២១ ពាណិជ្ជកម្មទ្វេភាគីរវាងកម្ពុជា និងម៉ារ៉ុក សម្រេចបានប្រមាណ ៤,៤លានដុល្លារអាមេរិក កើនឡើង ៤,៤២ ភាគរយបើធៀបនឹងឆ្នាំ២០២០ ខណៈការនាំចេញពីកម្ពុជាទៅសម្រេចបានជាង ៤,៣លានដុល្លារ៕